A cura del sito www. sambiase. com

Questi canti tramandati oralmente dai nostri anziani hanno conservato alla memoria storica, l'espressione viva e palpitante del popolo sambiasino. Questi canti tuttora si cantano prevalentemente in Chiesa e durante la processione. Prima si cantavano anche in momenti di festa rionale o per invocare grazie,richieste di guarigioni o, comunque, in momenti di gioia o drammaticità dell'esistenza sociale e anche personale. Sopratutto in questi momenti venivano ripresi i canti alla Madonna e a San Francesco di Paola. Il santo, qui a Sambiase, ha avuto un grande seguito perchè ha diffuso attraverso i suoi figli spirituali, i frati e i laici minimi, un profondo senso di disponibilità verso il bisognoso. Gierre

ROSARIO A SAN FRANCESCO (Sui grani grossi)
'Nta sta jiasa c'è nu gran Santu,
ci l'ha mandatu lu Spiritu Santu,
ci l'ha mandatu ccu amuri divinu
San Francescu Serafinu.

Prima decade
San Franciscu di Paula tu chi pua
dunami riparu alli mia guai
e prega, prega lu maestru tua
ca li bisuagni mia tu già li sai.

San Franciscu mia dilettu
vinìti alla mia casa ca v'aspettu
vinìti alla mia casa e trattinìti
ca li bisùagni mia vua li sapiti.

Seconda decade
San Franciscu, San Franciscu
giardinìari di Gesù Cristu
quandu all'uartu tu calàvi
rosi e jiuri siminàvi
ppi lla tua virginità
San Franciscu la carità.

San Franciscu mia bìallu
si vistùtu di monachiallu
e di Paula jìa e vinìa
gran miraculi facìa

Terza decade
O San Francesco nostro protettore
prega per noi il nostro Redentore.
Giorno di gloria, giorno di pianto,
o San Francesco ci accogli sotto il manto.

Quarta decade
Santo di grazia e Santo di virtù
vogliamo la pace per mezzo di Gesù.
Santo di grazia noi ricorriamo a te,
vogliamo la pace che al mondo non c'è.

Quinta decade
San Franciscu ccu st'abitu di lana
vulisti amari Diu di veru cori
lasciasti il mondo ch'era cosa vana
e llu dunasti a Diu l'opinioni.
Cum'è biallu San Franciscu
ccu stu capucciu misu
è davanti la Trinità
San Franciscu la carità

Conclusione
San Franciscu era Ilu viantu
la sua barca era d'argiantu
l'angioletti ppi marinari
San Franciscu a navigari
Nua prigamu a San Franciscu
ch'è potenti e gran Signori
e discipulu di Cristu
fammi grazia San Franciscu.

CANTO BIOGRAFICO SU SAN FRANCESCO DI PAOLA
San Franciscu di Paula nativu
fu pigliàtu di picciulità,
propriu di quand'era piccirillu.
A fini pannizzi fu mpassàtu
eranu cumpusi la mamma e lu patri
ca ccu Franciscu nun sapìanu chi fari.
Si senti la vuci di l'Eternu Patri
lassatilu a Franciscu di mpassàri
mpassàtilu a pannizzi d'asprità
e pua mpurràti ccu rìaschi di lana
ca sulu sulu cessa lli gridàti
senza ninna si vò addurmintari.
San Franciscu a Milazzu avìa di jiri
n'duvi lu sua cummìantu avìa di andàri
vidìa na barca ccu remi e ccu vela

ccu lla sua manu la vozi fermàri:
«O marinàru vulèra nu piacìri'
ppi carità mi vulessi mbarcàri»,
u màrinàru ci fici sapìri:
«di cca nun mbarca chi nun ha dinàri».
San Franciscu sintìandu daccussì
jittàu llu mantu ppi barca e ppi vela
e ppi alberu a bacchetta ch'havìa a manu
navigàti, navigàti fraticelli mia
s'è vuluntà di Ddiu hamu di sbarcàri.

U marinaru chi vidètti chistu:
guarda, stu patri si va ad annigari,
ca si stu patri si va ad annigari
la pinitianza nua l'hamu di fari;
u marinaru s'ha misu a chiamari:
«votati patri si ti vua mbarcàri».
«Navigàti, navigàti, sbirri, cani,
ca a manu un lu tiagnu lu staffili».

San Franciscu nu iuarnu caminandu
dua giuvinotti u stavianu schirzandu
unu di chilli si vozi curcàri
ma friddu si truvau cchiu da a nivi
u sua cumpagnu s'ha misu a chiamàri: «vòtati patri
si u pua riviniri».
«Sai cchi ti dicu fratellu mia caru?
Si hai dinari, accattacci i candili
ca ccu lli Santi nun vil'haviti i piglìari
ppicchì li Santi vi puanu aiutari,
quandu tu nun ta pianzi e no ta cridi».

San Franciscu alla Francia avia di jiri
n'duvi lu Re lu vozi cunvucàri
ci ha fattu nu mangiàri bbìallu finu
ppi antipastu: galluzzu e fagianu
di vènnari si truvàu chilla iurnàta
ma San Franciscu nun si cambaràu
azau ll'uacchi alli celestiali
a carni, pisci a fici divintàri.
«Dimmi Franciscu, dimmi ppi piaciri
dimmi: ch'havuto oji ppi mangiari?»

«hai avutu quattro piasci bialli e fini
Ccumu Ddiu l’ha criati nta sti mari»

U Rre,sta cosa nun vozi cridiri.
«si nun criditi alli mia paroli
llu’uacu ci su llì reschi e li ricami».
Evviva evviva San Franciscu mia,tuttu
Chillu chi dici è verità
Evviva San Francesco di Calabria
Tuttu chillu chi dici è verità.